Monday, December 31, 2012

போய்வா நண்பனே.....!


வலைத்தள நண்பர்கள் அனைவருக்கும் வணக்கம். 2012 ஆம் ஆண்டின் இறுதி நாள் இது. இந்த ஆண்டு ஒவ்வொருவருக்கும் ஒவ்வொரு விதத்தில் அமைந்திருக்கும். ஒருவாறு உலக அழிவுப் பீதி ஒழிந்துவிட்டது. அப்படியும் அதை விடாமல் 2017 ஜனவரி 01 அன்று உலகம் அழியும் எனக் கூறிக் கொண்டு ஒரு குழு புறப்பட்டிருப்பதாகத் தகவல். வேணா... விட்டுருங்க...... உலகம் அழுதுரும்..... என்னளவில் மத்திம பலன்களைத் தந்த வருடம் இது. எண்ணியதில் நடக்காமல் போனவை பல, நடந்தவை சில. வழமைக்கு மாறாக ஆண்டிறுதி சிக்கல் தருவதாக அமைந்து விட்டது.


வலைத்தளத்திற்கு மீள் அறிமுகம் தந்து உள்நுழைந்த போது ஆரோக்கியமான முன்னேற்றம் இவ்வருடத்தில் கிட்டியுள்ளது. வலைத்தளம் பல புதிய நண்பர்களை உருவாக்கித் தந்திருக்கிறது. இன்னும் இனிக்கும் நினைவுகளும் கசக்கும் தருணங்களும் மனதில் முகம் காட்டிச் செல்கின்றன. இந்த ஆண்டு எனக்கு சில பாடங்களையும் கற்பித்துச் சென்றிருக்கிறது. சற்றே பயத்துடன் 2013 ஐ வரவேற்கத் தயாராகிக் கொண்டிருக்கிறேன். இந்த வருடத்தைப் போலவே அடுத்த வருடத்தின் மீதும் பலநூறு எதிர்பார்ப்புகள். எவை எவை நனவாகும் என்பதை யாரறிவார்?


என் வலைத்தள நண்பர்கள், உறவுகள் அனைவருக்கும் மனமார்ந்த 2013 புத்தாண்டு வாழ்த்துக்கள். எண்ணியவை எண்ணியபடி நடக்கவும் இன்னல்கள் நீங்கி இன்பங்கள் பெருகிடவும் உங்கள் அனைவரையும் "சிகரம்" வலைத்தளம் மனதார வாழ்த்துகிறது. காலம் கருணை காட்டினால் புது வருடத்தில் இனிதே சந்திப்போம். வாழ்த்துக்கள்.

Wednesday, December 19, 2012

உங்களுடன் சில நிமிடங்கள்.....!

வணக்கம் வலைத்தள வாசகர்களே. நலமா? நலம் வாழ வாழ்த்துக்கள். கடந்த நவம்பர் 5 ஆம் திகதி நமது தொடர் பதிவை ஆரம்பித்தோம். கடந்த டிசம்பர் 14 ஆம் திகதி வரை தொடர்ச்சியாக 40 பதிவுகள். 46 பதிவுகளை இடுவதாக இருந்தபோதும் 40 பதிவுகளை மட்டுமே இட முடிந்தது. கிட்டத்தட்ட நினைத்ததை முடித்துவிட்ட திருப்தி. தொடர் பதிவுக்கான நிறைவுப் பதிவாக இது அமைகிறது.

இத்தொடர் பதிவு எனக்கு பல அனுகூலங்களை ஏற்படுத்தித் தந்திருக்கிறது. சில தரப்படுத்தல்களில் முன்னேற்றம் கண்டிருக்கிறேன். தரப்படுத்தல்களுக்காக எழுதவில்லை என்றாலும் அதனூடான முன்னேற்றத்தில் மனதோரமாய் ஒரு மகிழ்ச்சி. பின்தொடர்பவர்களின் எண்ணிக்கை அதிகரித்திருக்கிறது. புதிய நண்பர்களை "சிகரம்" தளத்திற்கு வருக வருக என வரவேற்கிறேன்.

எனது இரு பதிவுகள் 4tamil media என்கிற இணையத்தளத்தில் மறுபிரசுரம் கண்டிருக்கின்றன. அத்தளத்திற்கு நன்றிகளை தெரிவித்துக் கொள்வதுடன் இரு பதிவுகளும் அத்தளத்தின் இணைப்புடன் இங்கே:





வலைப்பதிவுலக நண்பன் ஹாரி தனது தளத்தில் 19.12.2012 அன்று வெளிட்ட "2012 டாப் 20 பிளாக்(கர்)ஸ்" என்ற பதிவில் குறிப்பிட்டுள்ள 2012 இன் நம்பிக்கை தந்த அறிமுகப் பதிவர்கள் பட்டியலில் 6 பேரில் ஒருவனாக நானும் இருப்பது கண்டு மகிழ்ச்சி.

அடுத்த முக்கியமான விடயம் நமது உலக அழிவு பற்றிய வாக்கெடுப்பு முடிவுகள். வலது பக்கம் இணைக்கப்பட்டிருந்த இவ்வாக்குப் பெட்டி தொடர்பான முடிவுகள் இதோ................!!!!!!!!!

கேள்வி: 2012 இல் உலகம் அழியும் என்கிற கூற்றை நீங்கள் நம்புகிறீர்களா?

பதில்களும் முடிவும்:

மொத்த வாக்குகள்: 45
கள்ள வாக்குகள்: 000000000000000

பதில்களும் வாக்குகளும்:

ஆம்: 03 [06%]
இல்லை: 28 [62%]
எனக்கு கவலை இல்லை: 09 [20%]
ஆளை விடுங்க சாமி: 05 [11%]

இதன் படி உலக அழிவு என்பதை நம் பதிவுலக நண்பர்கள் நம்பவில்லை என்பது நிரூபணமாகிறது. வாக்களித்த அனைத்து நல்லுள்ளங்களுக்கும் மனமார்ந்த நன்றிகள்.


நமது தொடர் பதிவு உலக அழிவு பற்றிப் பேசாவிட்டாலும் உலகம் அழியப் போவதாகக் குறிப்பிடப்படும் அந்த தினம் வரை ஏதேனும் எழுதுவது என்றே தொடர் பதிவைத் துவங்கினோம். நல்லதொரு முடிவுரையுடன் தொடர்பதிவில் இருந்து விடைபெறுவது மிக்க மகிழ்ச்சி. இதுவரை ஆதரவு தந்த அனைவருக்கும் நன்றிகள். இனி நாம் நமது வழமையான பாணியிலேயே சந்திப்போம். விடைபெறுகிறேன் தோழர்களே. மீண்டும் அடுத்த பதிவில் சந்திப்போம்.

அன்புடன்,
சிகரம்பாரதி.

Friday, December 14, 2012

வாசிக்க.... நேசிக்க.....

வணக்கம் வாசகர்களே. இன்றைய பதிவில் பெரிதாக ஒன்றுமில்லை. ஆனால் இன்று நான் பார்த்த தளங்களில் எனக்குப் பிடித்த பதிவுகளை இங்கே பகிர்ந்து கொள்கிறேன். முடிந்தால் சென்று பார்த்து அங்கும் கருத்துரையுங்கள்.


தளம்: தீதும் நன்றும் பிறர் தர வாரா.

தளம்: அருணா செல்வம் 

தளம்: நினைவில் சில.... கனவுகள்!

தளம்: வெங்கட் நாகராஜ் 

இன்னிக்கு இது போதும். (இன்னும் வேணும்னாலும் நா இவ்ளோ தான் வாசிச்சேன்.) மீண்டும் சந்திப்போம். (மீண்டுமா? :) )

அன்புடன்,
சிகரம்பாரதி.

Thursday, December 13, 2012

டுவிட்டர் @newsigaram

வணக்கம் வலைத்தள வாசகர்களே. இன்று நான் ரசித்த சில ட்வீட்களை இங்கே பகிர்ந்து கொள்கிறேன். படித்து ரசியுங்கள். பிடித்தவர்கள் என்னைப் பின் தொடருங்கள்.



@# காபியின் சுவைக்கு சிக்கரி கலப்பது போல்தான்...வாழ்க்கைக்கு கடவுள்...#புதுமைப்பித்தன்

@# உண்மையான பயணிக்குத் தான் எங்குச் செல்கிறோமென்று தெரியாது#காலச்சுவடு

@# 7+8=ஏழெட்டு... 8+7=????:-)

@# சிறை அறையிலிருந்து தூக்கு மேடைக்கு அழைத்து செல்லும் பொழுதே கண்களை மூடி விடுவார்கள் # படித்தது!

@# புள்ளியை மிக சிறிய வட்டமென்போர் வட்டத்தை பெரிய புள்ளி என்றும் ஒப்புக்கொள்ள வேண்டும்

@# புனிதர்கள் கல்லெறிந்து கொண்டிருக்கிறார்கள்.,அவர்களுக்கு தெரியவில்லை அவர்கள் கை பட்டதும்தான் அவை கல்லாகின என்று !


@# காதலுக்கு நேர்ந்து விட்ட ஆடு நான். கண்களெனும் கத்தி ஏந்தி காத்து நிற்கும் கடவுள் நீ

@# யாரிடம் கற்கிறோமோ அவரே ஆசிரியர். கற்றுக்கொடுப்பவரெல்லாம் ஆசிரியர் அல்லர்.

@# அம்மாவின் சந்தோஷம் துக்கம் இரண்டிலும் என் மீது எறியப்படும் வார்த்தைகள்..ஏன்டா என் வயித்துல பொறந்து தொலைச்ச?

@# உன்னை அழைக்க அல்ல என் தலையணைக்குபெயர் சூட்டவே கேட்கிறேன் "உன் பெயர் என்ன "?

@# பலமுறை தேடியும் இன்னும் கிடைக்கவில்லை நினைத்தமாத்திரத்தில் என் இமைகதவை மூடிவைக்க ஓர் சாவி...

இன்னும் இருக்கு... ட்வீட்டுக்கள் தொடரும்.......

அன்புடன்,
சிகரம்பாரதி.

Wednesday, December 12, 2012

அன்னைத் தமிழ்


வணக்கம் அன்பு ரசிகர்களே. முகநூலில் "எழுத்தோலை பக்கம்" நடாத்தும் புத்தாண்டுக் கவிதைப் போட்டி - 2013 க்காக எழுதப்பட்ட கவிதை இது. அவர்கள் வழங்கியுள்ள மூன்று தலைப்புகளில் "அன்னைத் தமிழின் இன்றைய நிலை" என்ற தலைப்புக்காக இக்கவிதை எழுதப்பட்டுள்ளது. தரப்பட்ட மூன்று தலைப்புகளிலும் எழுதுதல் கட்டாயமாகும். இக்கவிதைப் போட்டியில் பங்குபற்ற விரும்புவோர் முகநூல் வாயிலாக "எழுத்தோலை பக்கம்" இனை அணுகவும். இதோ கவிதை.

அன்னைத் தமிழின் இன்றைய நிலை 

[அன்னைத் தமிழ் - நான் இட்ட தலைப்பு]


மம்மியென்பார் டாடியென்பார் 
மரியாதை அதில்தான் என்பார் 
அன்னைக்குக் கிழிந்த ஓலைப் பாயும் 
அந்நிய மொழிக்கு அரியணையும் தருவார்.


சொல்லுக்குச் சொல் சுகமென்பார் 
செந்தமிழின் சுவையறியார் 
அக்கரைக்கு இக்கரைப் பச்சை 
அந்நிய மொழியில் ஏன் இத்தனை இச்சை?


ஷேக்ஸ்பியரும் ஷெல்லியும் 
செய்ததுதான் சாதனை என்பார் 
தொல்காப்பியமும் புறநானூறும் 
தொலையட்டும் என்பார் 


தாய்ப்பாலுடன் சேர்த்து 
தமிழறிவும் புகட்டிடுவீர் தாய்மாரே 
அன்னைக்குப் புரியாதோ அன்னையின் வேதனை 
அன்னைத்தமிழுக்கு ஏன் இத்தனை சோதனை 


கம்பனும் பாரதியும் கவிசொன்ன தமிழ் 
கல்லையும் கரைக்கும் திருவாசகம் தந்த தமிழ் 
வாழ்வற்ற வாழ்வு இங்கு வாழ்வதும் ஏனோ 
வள்ளுவன் வளர்த்த தமிழ் வழக்கொழிந்து போயிடுமோ 


அபயக்குரல் எழுப்புகிறாள் தமிழன்னை 
அவள்துயர் துடைக்க எழுச்சிகொள் தமிழா 
இருளே கதியென்று இருந்தது போதும் தமிழுக்கு 
இதுதான் விடிவென்று உணர்ந்தே எழுந்திடுவோம்!

அன்புடன்,
சிகரம்பாரதி.

Tuesday, December 11, 2012

சிங்களத் தீவினுக்கோர் பாலம் அமைப்போம்!



பல நிறைவேறாத கனவுகளுக்குச் சொந்தக்காரனான ஒரு மாபெரும் தமிழனுக்கு இன்று பிறந்த நாள் நினைவு. மஹாகவி சுப்பிரமணிய பாரதியார். எட்டயபுரத்துக் கவிஞன். சிங்களத் தீவினுக்கோர் பாலம் அமைப்போம் என்பது உட்பட தமிழுக்காகவும் தமிழ் மக்களுக்காகவும் அவன் கண்ட கனவுகள் பலவும் நிராதரவாகக் கிடக்கின்றன. முகநூல், டுவிட்டர் மற்றும் இன்னபிற தளங்களிலும் எல்லோரும் பாரதி புகழ் பாடுகின்றனர். எல்லாம் இன்றிரவோடு சரி. நாளைய ரஜினிகாந்தின் பிறந்தநாள் கொண்டாட்டங்களோடு எல்லாம் மறந்துபோய்விடும். வாருங்கள், ஒரு பாரதி பாடலைப் பார்த்துவிட்டுப் பேசலாம்.



(சிந்து நதியின்.......)



இன்று மட்டுமில்லை, என்றுமே போற்றப்பட வேண்டிய கவிஞன் பாரதி. மண் விடுதலைக்காகவும் பெண் விடுதலைக்காகவும் பாடுபட்டவன். பாரதியைப் பற்றி இன்றளவிலும் ஏராளமான ஆய்வுகள், விமர்சனங்கள் மற்றும் தரவு ரீதியான ஆய்வுகள் வெளிவந்துள்ளன. இனி பாரதியைப் பற்றி ஆய்வு செய்ய வேண்டுமானால் புதியதொரு கோணத்தை கண்டுபிடித்தாக வேண்டும். ஆயினும் என்ன பயன்? பலருக்கு கலாநிதிப் பட்டங்களையும் இன்னபிற கௌரவங்களையும் பேரையும் புகழையும் வாங்கிக் கொடுத்துள்ளதே தவிர சமூகத்தின் பாமர மக்களிடையேயோ அல்லது உயர் வர்க்கத்தினரிடையேயோ எந்தவொரு மாற்றத்தையும் ஏற்படுத்தியதாகத் தெரியவில்லை. இன்னும் ஒரு பாரதி பாடல் - நிற்பதுவே நடப்பதுவே......




ஏட்டில் மட்டும் வைத்துப் பாதுகாப்பதற்கு எழுதிவைக்கவில்லை நம் எட்டயபுரத்து முண்டாசுக் கவி. எடுத்துப் படித்து அதன்வழி மக்கள் பயனுற வேண்டும் என்றே எழுச்சி கொண்டு எழுதினான். இன்றைய நாளில் பாரதி எழுதிய கவிதைகளில் அது சிறந்தது, இது சிறந்தது என்று சிலாகித்துச் செல்ல நான் விரும்பவில்லை. பாரதிக்கும் நமக்கும் தூரம் அதிகம். அவன் எழுச்சி மிக்கவன். நாம் இன்னமும் எழுச்சியின் சுடரையே தரிசிக்காதவர்கள். ஒன்று மட்டுமே சொல்லலாம். உண்மையாய் உள்ளம் ஒன்றி உச்சரிக்க இயன்றவர்கள் மட்டும் பாரதி பற்றியும் மற்றைய உன்னதமான தமிழ்க் கவிகள் பற்றியும் பேசுங்கள். ஏனையோருக்கு இருக்கவே இருக்கிறார்கள் தெருவுக்கொரு போலிக் கவிகள். அவர்கள் வால் பிடித்துத் திரியுங்கள். சின்னஞ் சிறு கிளியே...... - பாரதி பாடல்




முகநூலில் ஒருவர் இப்படிக் கூறியிருந்தார். 'உன்னைப் போல் தலைவர்களின் பிறந்தநாட்களைக் கொண்டாடும் வழக்கம் எம் மத்தியில் இருப்பதால் தான் இன்றைக்கு உன்னையும் நினைத்துப் பார்க்க முடிகிறது.' சமூகம் என்ன நிலையில் இருக்கிறது என்பதற்கு இது ஒரு நல்ல எடுத்துக்காட்டு. பாரதியின் கனவுகள் பலிதமாக வேண்டும் என்று பிரார்த்திப்பதைத் தவிர இந்நாளில் அவனுக்காய் செய்யக் கூடியது ஒன்றுமில்லை. ஹாப்பி பர்த்டே சொல்வதற்கு உங்கள் வீட்டு நாய்க்குட்டியல்ல அவன். தயவு செய்து தமிழனின் பெயரைக் கெடுக்காதீர்கள். நல்ல வேளை பாரதி இன்று உயிரோடு இல்லை. இருந்திருந்தால் அவரது முகநூல் பக்கத்திற்கு வாழ்த்தட்டை அனுப்பியிருப்பார்கள். பாரதி பற்றிய தொகுப்புடன் ஒரு பாடல் - காணி நிலம் வேண்டும்.........




ஏட்டளவில் இருக்கும் பாரதியின் கனவுகளெல்லாம் நிஜமாக வேண்டும். அதுவரை பாரதியின் பிறந்தநாளையும் இறந்தநாளையும் நினைவு கூர்வதில் அர்த்தம் ஏதும் இருக்கப் போவதில்லை. சாதிக் கொடுமை, பெண் விடுதலை, தமிழின் அருமை என்று அவன் பாடியதெல்லாம் தன் சமூகத்தின் உயர்வுக்காகவே அன்றி தன் புகழ் கருதியல்ல. தன்னலம் மறப்போம். அவன் கனவுகள் மனதினில் சுமப்போம். நாளைய விடியல் தமிழர்களுக்கான உண்மையான விடியலாய் அமையட்டும். கேளடா மானிடா.... - பாரதி பாடல்




அன்புடன்,
பாரதியின் கனவுகளுடன்,
சிகரம்பாரதி.

Monday, December 10, 2012

குவியம்

வணக்கம் அன்பு ரசிகர்களே! கிரிக்கெட்டைப் போலவே திரையுலகத்தையும் மூன்று வகையாகப் பிரிக்கலாம். டெஸ்ட் கிரிக்கெட் - தொடர் நாடகங்கள். ஒரு நாள் கிரிக்கெட் - திரைப்படம். இருபது-20 போட்டி - குறுந்திரைப்படங்கள். இன்று நான் பேசப்போவது ஒரு குறுந்திரைப்படத்தைப் பற்றி. பொதுவாகவே குறுந்திரைப்படங்களைப் பார்ப்பதில் நம்மவர்கள் பெரிதாக அக்கறை செலுத்துவதில்லை. நானும் தான். அண்மையில் எனக்கு இரண்டு குறுந்திரைப்படங்களை YOUTUBE வாயிலாகப் பார்க்கக் கிடைத்தது. அதில் என்னைக் கவர்ந்தது ஒன்று மட்டுமே.

"குவியம்"

ஒரு காதல் கதை. குறுந்திரைப்படத்திற்கான அம்சங்கள் அழகாய்ப் பொருந்திய ஒரு கதை. கொஞ்சம் நகைச்சுவை, கொஞ்சம் விறுவிறுப்பு, கொஞ்சம் காதல் - அதுதான் குவியம். ஒரு தொழில்முறை புகைப்படப்பிடிப்பாளனின் கதை. தொய்வில்லாத கதை பலம். பின்னணி இசையும் காட்சியமைப்பும் போதுமான அளவுக்கு இருக்கிறது. கதைச் சுருக்கமெல்லாம் சொல்ல முடியாது. ஏனெனில் சுருக்கமான கதைதானே குறுந்திரைப்படத்தின் பிரதான அம்சமே.

இந்தப் பதிவின் மூலம் நான் சொல்ல முனைந்த விடயங்கள் இவை தான்.

01. குறுந்திரைப்படம் என்பது திரைப்படத்திலும் பார்க்க அழகிய கலை. இதை ஊக்குவிக்க நாம் ஒவ்வொருவரும் முன்வர வேண்டும்.

02. குறுந்திரைப்படத்திற்கென தனியானதொரு அடையாளம் நம் சமூகத்தின் மத்தியில் இல்லை. அந்த அடையாளம் வழங்கப்பட வேண்டியது காலத்தின் தேவையாகும்.

03. திரைப்படங்களைப் போல வணிக நோக்கம் தவிர்த்து வெளியிடப்படுபவை என்பதால் சமூகத்தின் ஆதரவு நிச்சயம் தேவை.

04. முன்னணி திரைப்படத் தயாரிப்பாளர்கள் உட்பட வசதி படைத்தவர்கள் எல்லோருமே ஏதேனும் ஒரு குறுந்திரைப்படத் தயாரிப்பதற்கு உதவ முன்வர வேண்டும்.

இன்னும் உங்களால் முடியுமானவரை உதவிகளை நல்குங்கள். நாளைய சமூகம் ஒளிமிக்கதாய் மலரட்டும்!




Sunday, December 9, 2012

இன்னிக்கு பதிவு போடலை!

இன்னிக்கு பதிவு போடலைன்னு சொல்லியும் நம்ம பதிவைப் பார்த்தே தீருவேன்னு வந்திருக்க உங்க எல்லாருக்கும் வணக்கம். ஏதாச்சும் சொல்லிட்டுப் போகலாமேன்னு பார்த்தா மரமண்டைல ஒண்ணுமே தோன மாட்டேங்குது. அது சரி. பானைல இருந்தாதானே அகப்பைல வரும்குறீங்களா? உங்ககிட்ட ஒரு கேள்வி. எல்லாரும் உலகம் அழியப்போகுதுன்னு சொல்லிக்கிட்டிருக்காங்க. ஒரு வேளை அப்படி அழிஞ்சா உங்ககூட நீங்க கொண்டு போக விரும்புற ஒரு பொருள் எது? பார்க்கலாம், எத்தன பேரு பதில் சொல்றீங்கன்னு?

Saturday, December 8, 2012

ஒரு கோப்பைத் தேநீர்

வலைத்தள வாசகர்களுக்கு வணக்கங்கள் பல. இன்று பேசப் போகும் விடயத்திற்கு போவதற்கு முன்னால் ஒரு செய்தி. கடந்த 3 ஆம் திகதியுடன் குறுஞ்செய்திச் சேவை 20 ஆண்டுகளைப் பூர்த்தி செய்திருக்கிறது. அதற்கு எமது வாழ்த்துக்களும் வருத்தங்களும் உரித்தாகட்டும். அது தொடர்பான சிறப்புக் கட்டுரை "வீரகேசரி" இணையத்தளத்தில் இருந்து:


ஒரு கோப்பைத் தேநீர்!

ஏற்றுமதிக்கான தேயிலைப் பொதியிடல் நிறுவனமொன்றில் உதவி மூலப்பொருள் கட்டுப்பாட்டாளர் (Asst Material Controller) ஆக நான் பணிபுரிகிறேன். ஆகவே எனது தொழில்சார் பதிவொன்றை எழுதவேண்டும் என்பது என் ஆசையாக இருந்தது. அதனால்தான் இந்தப் பதிவு. விளக்கப் படங்களுடன் குறிப்புகளும் இடம்பெறும். படித்து உங்கள் கருத்துக்களையும் சொல்லுங்கள்.

01. தேயிலைப் பயிரிடல் 


02. கொழுந்து பறித்தல் 


மேலதிக விபரங்களுக்கு:

03. கொழுந்து நிறுத்தல் 


04. தேயிலையைப் பதனிடல் 


05. பொதியிடலுக்கான தேயிலை விநியோகம். இது 40 முதல் 60 கிலோ வரையிலான பைகளில் அடைக்கப்படும்.


06. ஒரு கிராம் முதல் 3 கிராம் வரையிலான தேயிலைப் பைகளை உற்பத்தி செய்யும் இயந்திரங்கள். இந்த இடத்திலிருந்தே நான் தொழில் புரியும் நிறுவனத்தின் பணிகள் ஆரம்பிக்கின்றன. 01 முதல் 05 வரையானவை பெருந்தோட்ட நிறுவனங்களால் மேற்கொள்ளப் படுபவை ஆகும்.

06.01. Double Chamber Tea Bagging Machines



06.02. Double Chamber Tea Bags


Produced tea bags.

06.03 Single Chamber Tea Bagging Machines



06.04 Single Chamber Tea Bags



இவ்வாறாகப் பொதி செய்யப்பட்ட தேயிலைப் பைகள் பின் ஏற்றுமதிக்குத் தயார்படுத்தப்பட்டு விநியோகிக்கப்படுகின்றன. ஒவ்வொரு வகையான தேயிலைப் பைகளையும் உற்பத்தி செய்வதற்கு பல்வேறு இயந்திரங்கள் காணப்படுகின்றன. இங்கு விளக்கப்பட்டுள்ளவை இரண்டு வகையான இயந்திரங்கள் மட்டுமே. இந்த இயந்திரங்களில் தேயிலைப் பைகள் உற்பத்தி செய்யப்பட்டதும் அவற்றை முறையாகப் பொதி செய்வதற்கான இயந்திரங்களும் காணப்படுகின்றன.

அவ்வாறு பொதி செய்து பூரணப்படுத்தப்பட்ட பின்னர் பாரிய தாங்கிகளில் ஏற்றி வெளிநாடுகளுக்கு அனுப்பப் படுகின்றன.


இதுவொரு முழுமையான பதிவல்ல என்பதை நான் அறிவேன். ஆனால், தேயிலைப் பைகளின் ஏற்றுமதி நடைபெறும் செயன்முறை இதுதான் என்பதை தங்களுக்கு உணர்த்திக் காட்டியிருக்கிறேன். அவ்வளவுதான். முடிந்தால் இன்னொரு நாள் முழுமையான விளக்கத் தொடர் பதிவுடன் சந்திப்போம்.

இலங்கையின் தேயிலைத் துறை சம்பந்தமான சகல தகவல்களையும் பெற்றுக்கொள்ள இலங்கைத் தேயிலைச் சபையின் இணையத்தளத்தை அணுகுங்கள்.

அன்புடன்,
சிகரம்பாரதி.

Friday, December 7, 2012

சொய்............... சொய்...............

வணக்கம் அன்பு சொந்தங்களே! இன்று அண்மையில் வெளியான என் மனம் கவர்ந்த பாடல்கள் பற்றி பகிர்ந்துகொள்ளப் போகிறேன். வாருங்கள் போகலாம்.

"கும்கி" இதுதான் இன்றளவில் சக்கை போடு போட்டுக்கொண்டிருக்கும் திரைப்படப் பாடல்கள் இடம்பெற்றுள்ள திரைப்படம். 5 காதல் பாடல்கள். அத்தனையும் அழகான மெல்லிசைப் பாடல்கள். டி.இமானின் இசையில் பிரபுசாலமனின் இயக்கத்தில் விரைவில் வெளியாகவிருக்கும் திரைப்படமே கும்கி.  நடிகர் பிரபுவின் மகன் விக்ரம் பிரபுவும் நடிகை லட்சுமி மேனனும் அறிமுகமாகும் திரைப்படம் இது. லிங்குசாமியின் திருப்பதி பிரதர்ஸ் மற்றும் ஞானவேல்ராஜாவின் ஸ்டுடியோ கிரீன் நிறுவனமும் இணைந்து வெளியிடுகின்றன.

இதுவரை கேட்டதில் இரண்டு பாடல்கள் என்னைக் கவர்ந்துள்ளன. ஒன்று சொல்லிட்டாளே அவ காதல பாடலும் மற்றையது சொய்... சொய்... பாடலும் தான். இரண்டுமே அருமையான காதல் கானங்கள். இந்த வருடத்தின் முத்தான பாடல்கள் இவைதான் என்றால் கூட மிகையில்லை. சொல்லிட்டாளே அவ காதல பாடலை ரஞ்சித் மற்றும் ஸ்ரேயா கௌஷல் ஆகியோரும் சொய்.. சொய்.. பாடலை மகிழினி மணிமாறனும் பாடியுள்ளனர்.யுகபாரதியின் பாடல் வரிகள் அருமை.

ஏனைய பாடல்கள்:
01. அய்யய்யோ..... ஆனந்தமே.....
02. நீ எப்போ புள்ள....
03. ஒன்னும் புரியல 

இப்போதைக்கு இப்பாடல்களைக் கேட்டு ரசிப்பதற்கான இணைப்பைத் தருகிறேன். நேரம் வாய்த்தால் பாடல் வரிகளுடன் சந்திப்போம்.

01. எல்லாப் பாடல்களையும் ரசிக்க.......
02. சொல்லிட்டாளே அவ காதல......
03. சொய்.... சொய்.....
04. கதாநாயகியின் நேர்காணல்.....

05. கும்கி இசை வெளியீட்டுவிழா.....
05. திரை முன்னோட்டம்.... (Trailer)
அன்புடன்,
சிகரம்பாரதி.

Thursday, December 6, 2012

எதிரே மின்னஞ்சல் திருடர்கள் கவனம்! - இணையம் ஒரு தகவல்

வணக்கம் அன்பார்ந்த வலைத்தள வாசகர்களே. நமது அன்றாட வாழ்க்கையில் இணையம் இன்றியமையாத ஒன்றாகிவிட்டது. சாதாரண மக்கள் தொடங்கி பெரும்புள்ளிகள் வரை அனைவரையும் இணையம் கட்டிப்போட்டிருக்கிறது. இணையத்தள பாவனையானது சில முக்கிய காரணங்களைக் கொண்டமைகிறது. அவை:

01. சமூக வலைத்தளம்
02. மின்னஞ்சல்
03. இணையவழித் தொலைத்தொடர்பாடல்
04. செய்திகள் (அனைத்து வகையானவையும்)
05. வலைப்பூக்கள்
06. தரவிறக்கங்கள்
07. தகவல் தேடல்

எந்த வகையான இணையப் பாவனையாக இருந்தாலும் இந்த 7 வகைகளுக்குள் அடங்கிவிடும் என்பது எனது நம்பிக்கை. இந்தக் கட்டுரைத் தொடரானது பாதுகாப்பானதும் இலகுவானதுமான இணையப் பாவனைக்கு வழிகாட்டும் ஒரு தொடராக அமையவிருக்கிறது. முதலில் மின்னஞ்சல் பாவனை பற்றிப் பார்ப்போம்.

http://www.theemailadmin.com/wp-content/uploads/2012/11/GFI244-email-jpg1.jpg

இணையம் பாவிப்போரில் பெரும்பாலானோருக்கு ஏதோவொரு மின்னஞ்சல் கணக்கு இருக்கும். வர்த்தகம், தனிப்பட்ட மற்றும் பொதுப் பாவனை கருதி மின்னஞ்சல்கள் பாவிக்கப் படுகின்றன. இந்த மின்னஞ்சல் கணக்குகள் மூலம் தனிப்பட்ட தகவல்களும் பரிமாறப்படுவதால் நமது பாதுகாப்பானது கேள்விக்குள்ளாகின்றது. இணையத்தள குற்றங்களில் 25 வீதமானவை மின்னஞ்சல் திருடர்களினாலேயே இழைக்கப்படுகின்றன.

ஆகவே பாதுகாப்பான மின்னஞ்சல் பாவனைக்கு பல்வேறு வழிமுறைகள் பரிந்துரைக்கப்பட்ட வண்ணமே உள்ளன. அவற்றுள் பல கடினமானவையாகவும் சாமானியர்களால் கடைப்பிடிக்க முடியாதவையாகவும் உள்ளன. உங்களுக்கும் அது போன்றதொரு அனுபவம் நேர்ந்திருக்கலாம். அப்படியானால் இந்த வழிமுறைகளைக் கொஞ்சம் பின்பற்றிப் பாருங்களேன்?

01. நம் பாவனை வகைக்கமைய வெவ்வேறு மின்னஞ்சல் கணக்குகளை பராமரித்தல்.

தற்போது பல்வேறு மின்னஞ்சல் கணக்குகளை ஒரு மின்னஞ்சல் கணக்கினூடாக பராமரிக்கக் கூடிய வசதி எல்லா மின்னஞ்சல் சேவை வழங்குனர்களினாலும் வழங்கப்பட்டுள்ளது.

02. தற்காலிக மின்னஞ்சல் கணக்குகளை பாவித்தல்.
குறுகிய காலப் பாவனை கருதி மின்னஞ்சல் சேவைகளை வழங்கும் இணையத்தளங்கள் பல உள்ளன. நமது விபரங்கள் எதையும் வழங்காமல் முன்பதிவு இல்லாமல் எழுமாறாக தெரிவு செய்யப்பட்ட மின்னஞ்சல் முகவரிகளைக் கொண்டு நமது தற்காலிக தேவைகளைப் பூர்த்தி செய்து கொள்ள முடியும். இதன் மூலம் நமது பிரதான மின்னஞ்சல் கணக்குகளின்  ரகசியத்தன்மையைப் பாதுகாத்துக் கொள்ளலாம். இணையத்தில் temporary email என்று தேடுவதன் மூலம் குறித்த இணையத்தளங்களின் பட்டியலைப் பெற்றுக் கொள்ள முடியும்.


ஒவ்வொரு இணையத்தளங்களும் சில வித்தியாசங்களைக் கொண்டுள்ளன என்பதால் அவற்றில் கொடுக்கப்பட்டுள்ள அறிவுறுத்தல்களைப் பின்பற்றுங்கள்.

03. உங்கள் மின்னஞ்சல் முகவரிகளை இணையத்தளங்களுக்கு வழங்க முன்பதாக அவர்கள் என்ன நோக்கத்துக்காக கேட்கிறார்கள் என்பதை அறிந்து பொருத்தமான மின்னஞ்சல் முகவரியை வழங்குங்கள்.

04. குறைந்தது இரண்டு மின்னஞ்சல் கணக்குகளையேனும் பயன்படுத்துங்கள். உங்கள் தனிப்பட்ட தேவைக்கும் பொதுவான தேவைகளுக்கும் என அவற்றை வகைப்படுத்தி வைத்துக் கொள்ளுங்கள்.

05. பொது இடங்களில் மின்னஞ்சல் கணக்குகளைக் கையாளும் போது அவதானமாக இருங்கள்.

அதாவது இணைய உலாவி மையங்களில் (Internet Browsing Centers) உங்கள் மின்னஞ்சல் கணக்கினை உபயோகித்து முடிந்ததும் பொறுமையாக இருந்து முறையாக கணக்கிலிருந்து வெளியேறிவிடுங்கள் (Log out).


உங்கள் இணையப் பாவனை முடிந்ததும் நீங்கள் உலாவிய நேரத்துக்குரிய இணையத் தரவுகளை (History) முழுமையாக அழித்துவிடுங்கள்.

இவை பொதுவான அறிவுறுத்தல்கள் தான். இன்னும் ஏதேனும் இருப்பின் அடுத்த பகுதியில் சொல்கிறேன். உங்களுக்குத் தெரிந்த வழிமுறைகள் இருந்தால் பின்னூட்டம் ஊடாக பகிர்ந்து கொள்ளுங்கள்.

மீண்டும் நாளை சந்திக்கும் வரை
அன்புடன்,
சிகரம்பாரதி.

Wednesday, December 5, 2012

நீ - நான் - காதல் - 03

இரண்டு கவிதைகள்

01.
சூரிய ஒளியைப் பெற்று
சந்திரன்
பிரகாசிப்பது போல
என் இதயமும்
உன்னிடமிருந்து
காதலைப் பெற்று
உயிர்வாழ்கிறது




02.
நீ என்னைக்
கட்டியணைத்து
முத்தம் தந்தபோதுதான்
புரிந்தது
எனக்கு மட்டும்
இனிப்புச் சுவை நரம்பு
உதட்டில் தான்
இருக்கிறதென்று

தாம்பத்திய வாழ்க்கை சிறக்க சில டிப்ஸ்!

Tuesday, December 4, 2012

அடுத்த தலைமுறைக்கான அரசியல் விதிமுறைகள்! - 02

வணக்கம் வாசகர்களே! தொடர் பதிவின் பாதியைத் தாண்டி விட்டோம். இன்னும் 18 நாட்கள் மட்டுமே. உலக அழிவுக்கல்ல. நம் தொடர் பதிவின் நிறைவுக்கு. அதுவரை இடையூறுகள் இன்றி தொடர்பதிவுப் பயணம் சென்றிட உங்கள் ஆதரவை வேண்டி பதிவுக்குள் நுழைகிறேன்.


பகுதி - 02

கடந்த பதிவில் அரசியல்வாதியாக விரும்பும் ஒருவருக்கு அடிப்படைத் தகுதியாக கல்வியறிவு கட்டாயமாக்கப்பட வேண்டும் என வலியுறுத்தியிருந்தோம். இன்னும் என்னென்ன தகுதிகள் தேவை?

02. நாட்டின் தலைவர் கட்சி சாராதிருத்தல் 
நம் உலக நாடுகளில் பொதுவாக நாட்டின் ஜனாதிபதி அல்லது பிரதமர் பதவிக்கு தேர்ந்தெடுக்கப்படுபவர் ஒரு கட்சியின் முக்கியஸ்தராக காணப்படுவது வழமை. ஆனால் என்னைப் பொறுத்தவரை கட்சி சாராத ஒருவர் நாட்டின் தலைவராகப் பொறுப்பேற்பதன் மூலமே மக்களின் நலன்கள் பாதுகாக்கப் படும். அப்போது அவர் சகல கட்சிகளுக்கும் நடுநிலையானவராக இருப்பதுடன் கட்சியின் அழுத்தங்கள் இன்றி முடிவெடுக்கக் கூடியவராகவும் இருப்பார்.

ஆங்கமை வெய்தியக் கண்ணும் பயமின்றே
வேந்தமை வில்லாத நாடு.
நல்ல அரசு அமையாத நாட்டில் எல்லாவித வளங்களும் இருந்தாலும் எந்தப் பயனும் இல்லாமற் போகும்.
(பொருட்பால், நாடு)


ஒரு நல்ல அரசு என்பது அதன் நடுநிலைமைத் தன்மையிலேயே தங்கியுள்ளது. ஆகவே பக்கச்சார்பின்றிய ஒரு தலைவர் நாட்டிற்கு அமைய வேண்டுமெனில் அவர் கட்சி சார்பின்றியவராக இருத்தல் அவசியம்.

03. இளைஞர் அரசியல் 
அரசியலில் பழம் தின்று கொட்டை போட்டவர்கள் ஒதுங்கிக் கொண்டு புதிய தலைமுறைக்கு வழிவிட வேண்டும். செயல் திறன் மிக்கவர்களுக்கு முக்கியத்துவம் வழங்கப்படல் வேண்டும். புதியவர்கள் அரசியலில் ஈடுபட சான்றோர் அவர்களுக்கு வழிகாட்டிகளாக அமைய வேண்டும். 

இது வரை மூன்று பிரிவுகளில் என் எண்ணங்களை பகிர்ந்திருக்கிறேன். மூன்றும் சரியானது தானா என அறிய விழைகிறேன். மேலும் இந்த மூன்று மட்டும் போதாது. மிகுதி என்னவாக இருக்கும் என்ற உங்கள் எண்ணங்களையும் அறிந்துகொண்டு இப்பதிவைத் தொடரலாம் என்று எண்ணுகிறேன். உங்கள் கருத்துக்களை இங்கே பதிவு செய்யுங்கள். ஆக்கபூர்வமான கருத்துக்கள் பகிரப்படும் பட்சத்தில் இன்னும் விரிவாகப் பேசலாம்.

அன்புடன்,
சிகரம் பாரதி.

Monday, December 3, 2012

இது சாதனையாளர்களின் நாள்!

வணக்கம் வாசகர்களே! இன்று சர்வதேச மாற்றுத்திறனாளிகள் தினம். நம்மில் இது எத்தனை பேருக்கு தெரியும்? மேலும் மாற்றுத்திறனாளிகளை ஊனமுற்றோர், அங்கவீனர்கள் மற்றும் உடல் இயலாதவர்கள் என்று பலவாறாக அழைத்த வழக்கம் இப்போது மாறிவருகிறது. ஆனால் இன்னமும் அந்த வார்த்தைகளைப் பயன்படுத்தி அவ்வாறானோரை அவமானப்படுத்தும் பழக்கம் நம்மில் சிலருக்கு இருக்கிறது என்பது வேதனைக்குரிய செய்தி.

மாற்றுத்திறனாளிகளும் நம்மைப் போல் சமூகத்தின் அங்கத்தவர்களே என்பதை ஏற்றுக் கொள்ளுங்கள். அவர்களுக்கும் மனம் என்ற ஒன்று இருக்கிறது. அதனை நாம் புரிந்துகொள்ளாவிட்டாலும் கூட புண்படுத்தாமல் இருக்க வேண்டும். சில இடங்களில் பெற்றோரே இவர்களை வெறுத்து ஒதுக்கும் சூழ்நிலைகளை கண்கூடாகக் காண நேரும்போது மனம் படும் பாடு இதயத்தில் ஈரமுள்ள யாவருக்கும் புரியும். இந்த நாளைப் போல வருடத்தில் ஒரு நாள் மட்டுமில்லாது வருடத்தின் அத்தனை நாளிலும் நாம் அவர்களுக்கு மரியாதை செய்தல் வேண்டும். முகநூல் பக்கத்திலும் பலர் தமது ஆதரவுக் குரல்களைப் பதிவு செய்திருந்ததைப் பார்த்தேன். மிக்க மகிழ்ச்சி. பேசுவதோடு மட்டும் நின்றுவிடாது செயலிலும் நிரூபிக்க வேண்டும்.

மாற்றுத்திறனாளிகளை கௌரவிக்கும் முகமாக தமிழ்த் திரையுலகில் வெளியான இரண்டு முத்தான பாடல்களின் YOUTUBE இணைப்புகளை இங்கே வழங்கியிருக்கிறேன். 1. ஊனம் ஊனம் ஊனம் இங்கே யாருங்கோ - திரைப்படம் - போர்க்களம். 2. நில்லு நில்லு நில்லு சொந்தக்காலில் நீயும் நில்லு. இரண்டுமே அருமையான பாடல்கள். கேட்டு ரசிப்பதோடு நில்லாது உங்கள் சமூகத்தில் வாழும் மாற்றுத் திறனாளிகளையும் ஆதரவு தந்து உற்சாகப் படுத்துங்கள். அவர்களும் மனிதர்கள் தானே? இந்த நாளில் சோதனைகளை சாதனைகளாக்கத் துடித்துக் கொண்டிருக்கும் மாற்றுத்திறனாளிகள் அனைவருக்கும் மனமார்ந்த வாழ்த்துக்களை தெரிவித்துக் கொள்கிறேன்.




Sunday, December 2, 2012

பிரிவொன்றே முடிவல்ல

பிரிவு என்பது முடிவல்ல 
நம் வாழ்க்கை நாவலின் 
இன்னொரு அத்தியாயமே 
சோகங்கள் சுகமாகும் 
இன்பங்கள் வரமாகும் 
நினைவுகளே நம் உறவாகும் 
பிரிவு தரும் அனுபவங்களை 
உறவு தருவதில்லை 


முதன்முதலாய் நீ எழுதி
நான் ரசித்த கவிதை 
முதன்முதலாய் எனக்காய் நீ 
அழுத ஒரு துளி கண்ணீர் 
முதன்முதலாய் நாம் போட்ட 
சின்னச் சண்டை 
முதன்முதலாய் என் வீட்டில் நீ 
கால் வைத்த அந்த மணித்துளிகள் 
இவை எவையுமே என் 
நினைவுகளிலிருந்து 
கடைசிவரை நீங்கப்போவதில்லை 
ஆனால் முதன்முதலாய் 
நமக்கு ஓர் பிரிவு வந்தபோது 
நீ கடைசியாய் பார்த்த அந்த 
ஓராயிரம் அர்த்தமுள்ள 
மௌனப்பார்வை 
என்னுள்ளே பசுமரத்தாணியாய் 
புதைந்து போய்விட்டது 


அந்த ஓரிரு வினாடிகளில் 
எம் கண்கள் 
நமக்கே தெரியாமல் 
ஏதேதோ பேசியதை
நீ அறிவாயா ?
பிரிவுகள் நிரந்தரமல்ல 
இனிமைகளே வாழ்வுமல்ல 
அன்பு என்றும் தீர்வதுமல்ல 
எனக்கு நீ 
தாயாய்...... சகோதரியாய் 
தோழியாய் இருந்த 
அந்த கணங்களை 
எங்கனம் மறப்பேன் 


இனியும் கவி சொல்ல 
நான் விரும்பவில்லை 
ஏனெனில் 
நாம் பூவுலகில் 
எங்கோ ஓர் மூலையில் 
மீண்டும் சந்திக்கும் 
வேளை சிந்தும் வினாடிகளில் 
மௌனிக்கும் தருணங்களை 
ஒளியேற்ற 
வார்த்தைகளை இப்போதிருந்தே 
சேமிக்க வேண்டும் 


பிரிவொன்றே முடிவல்ல - ஆதலால் 
நீயும் நானும் 
வழிமீது விழி வைத்து - நம் 
அன்பு மீது நம்பிக்கை வைத்து 
பிரிவுகள் சந்திப்புக்களாகப் போகும் 
அந்த நாளுக்காய் 
அந்த தருணத்திற்காய் 
இனிமை தரும் கனவுகளோடு 
காத்திருப்போம் தோழி!

இக்கவிதை இலங்கையின் பிரபல வார இதழான "மித்திரன்" வார இதழில் 20.04.2008அன்று வெளியானது. எனது நண்பியின் தளமான "கவீதாவின் பக்கங்கள்" இல் இன்று ஒரு கவிதை வெளியாகியுள்ளது. அதையும் உங்கள் பார்வைக்குள் இணைத்துக் கொள்ளுங்கள்.

அன்புடன்,
சிகரம்பாரதி.

Saturday, December 1, 2012

அதிகாலைக் கனவு - சிறுகதை

அமெரிக்காவின் நியுயோர்க் நகரம்.
நேரம் மாலை ஆறு மணி. மின்விளக்குச் சூரியன்கள் தமது ஒளியைப் பரப்ப ஆரம்பித்திருந்த தருணம் அது.

இரட்டைக் கோபுரம் என்று சொல்லக் கூடிய வகையிலான ஒரு அலுவலகக் கட்டிடம். கிட்டத்தட்ட ஐம்பது மாடிகளாவது இருக்கும் என்று வைத்துக் கொள்ளுங்களேன். என்னுடைய அறை நாற்பத்து நான்காம் மாடியில் அமைந்திருந்தது. எட்டு எனக்கு ராசியான இலக்கம் என்ற ஒரு எண்ணம் நீண்ட நாட்களாகவே எனக்குள் இருந்து வருகிறது. எனவேதான் எனது அறையை நாற்பத்து நான்காம் மாடியில் மாடி எண் எட்டு வருமாப்போல அமைத்துக் கொண்டேன். நான் யார் என்று கேட்கிறீர்களா? எனது அறையை அமைக்க வேண்டிய இடத்தைத் தீர்மானிக்கும் "வல்லமை"யைப் பெற்றிருப்பதிலிருந்தே தெரிந்து கொண்டிருக்க வேண்டுமே, இந்தப் பாரிய வணிக சாம்ராஜ்யத்தின் தலைவன் நான் தான் என்று.

"டொக்.......டொக்......." - எனது அறைக் கதவை யாரோ தட்டும் சத்தம் கேட்கிறது.

"யெஸ்... கம் இன்....." - கதவைத் தட்டியவரை உள்ளே அழைக்கிறேன். எனது பிரத்தியேகச் செயலாளர் டயானா உள்ளே வந்து நின்றாள்.

டயானா மிக அழகானவள். அத்துடன் புத்திக் கூர்மையும் நிறைய உண்டு. அலுவலகத்திலேயே அவள்தான் அழகு என்று சொன்னால் கூட தவறேதுமில்லை. அவளின் அழகுக்காகத்தான் அவளை என் பிரத்தியேகச் செயலாளராக நியமித்திருக்கிறேன் என்ற ஒரு பரவலான பேச்சும் இங்கு உண்டு. அதை நான் மறுக்க விரும்பவில்லை, ஆனால் அதுவே உண்மையும் இல்லை.

"எல்லாம் தயாரா?" - நான் வினவினேன் 
"தயார் சேர். நீங்க வந்தா ஆரம்பிச்சிடலாம்." - அவள் பதிலளித்தாள் 
"ஓகே!"  என்று சொல்லிவிட்டு எனது ஆசனத்திலிருந்து எழுந்து மேசை மேலிருந்த கறுப்புக் கண்ணாடியை எடுத்து அணிந்துகொண்டு மிடுக்காக நடக்க ஆரம்பித்தேன். என் மேசை மீது கிடந்த மூன்று கோப்புகளை எடுத்துக் கொண்டு டயானா என்னைப் பின்தொடர்ந்தாள். 

எமது அலுவலகத் தொகுதியின் கடைசி மாடிக்கு மின்னுயர்த்தி மூலம் சென்று கூட்டம் நடைபெறும் அறையை நோக்கி நாம் நடந்தோம். சட்டென்று டயானா சற்று முன்னோக்கிச் சென்று அறைக்கதவைத் திறந்துவிட்டாள். நான் கம்பீரமாக உள்ளே நுழைந்தேன். உலகின் பல முக்கிய வர்த்தகப் பிரமுகர்களெல்லாம் எழுந்து நின்று எனக்கு மரியாதை செய்தனர். அனைத்தையும் 'சாதாரணமாக' எடுத்துக்கொண்டு, எனது ஆசனத்தில் அமர்ந்தபின் "தேங்க் யு.. சிற் டவுண்" என்று சொல்லிவிட்டு உரையாற்ற ஆரம்பித்தேன்.


"வெரி..............."
திடீரென்று என்னால் பேச முடியவில்லை. எனக்கு முகத்தில் வேர்த்தது போலிருந்தது. 

"டேய்... எழும்புடா...." என்ற சத்தம் ஒரு பெண்குரலில் எனக்குக் கேட்டது. யாரது? என்னையே மிரட்டுவது? டயானாவா? இல்லையே! வேறு யார்?

கண்களைத் தேய்த்தபடி விழித்துப் பார்த்தேன். அட, அம்மா! 'ச்சே... அத்தனையும் கனவு......!'

"எந்திரிச்சு வந்து மூஞ்சியக் கழுவு." - அம்மா உத்தரவிட்டுச் சென்றாள்.

இந்த அம்மா எப்போதுமே இப்படித்தான். எனது நிறுவனக் கூட்டத்தில் என்னைப் பேச விடுவதேயில்லை. சரியாக பேச வாய்திறக்கும் நேரத்தில் வந்து எழுப்பி கனவைக் கலைத்து விடுவாள். சரி, அதிகாலைக் கனவு என்றாவது பலிக்கும்  என்கிறீர்களா? இது அதிகாலையாய் இருந்தால் தானே கனவு பலிப்பதற்கு..........!?

'என்ன, அதிகாலை இல்லையா? அப்போ கனவு?' என்று கேட்கிறீர்களா?  கோடை வெயில் கொளுத்திக் கொண்டிருக்கும் 'அதிகாலை' பத்தரை மணியை நீங்கள் 'அதிகாலை' என்று ஒப்புக்கொள்ள நீங்கள் தயாரானால் எனது "அதிகாலைக் கனவு"ம் நிச்சயம் பலிக்கும்!

Friday, November 30, 2012

முக நூல் முத்துக்கள் - 03

வணக்கம் வலைத்தள வாசகர்களே. இன்று வெளிவரவிருந்த நேற்றைய பதிவின் தொடர்ச்சியை தவிர்க்க முடியாத காரணங்களினால் (நண்பன் ஒருவனின் தந்தையாரின் இறுதிச் சடங்கில் கலந்துகொள்ள செல்லவேண்டியுள்ளது.) இவ்வார இறுதிக்குள் வெளியிட தீர்மானித்திருக்கிறேன். அவசரமாகத் தயார் செய்த பதிவு இது என்றாலும் உங்கள் மனதைக் கவரும் என்று நம்புகிறேன். நேற்றைய பதிவினை வாசிக்க இங்கே சொடுக்குங்கள்:

அடுத்த தலைமுறைக்கான அரசியல் விதிமுறைகள்!


01. பணக்கார இளைஞனின் விலையுயர்ந்த கார் நின்றுகொண்டிருந்தது.
ஏழைச் சிறுவன் ஒருவன் எட்டி நின்று அந்தக் காரையே
ஆசையுடன் பார்த்துக் கொண்டிருந்தான்.

சிரித்துக்கொண்டே அந்த இளைஞன் சொன்னார், “இது என் அண்ணன் எனக்குப் பரிசளித்தது”.

சிறுவன் முகத்தில் வியப்பு.

“உனக்கு அப்படி ஓர் அண்ணன் இருந்திருக்கலாம் என்று ஆசைப்படுகிறாயா?” இளைஞர் கேட்டார்.

சிறுவன் சொன்னான், ‘இல்லை! அப்படியோர் அண்ணனாக வளர வேண்டுமென்று விரும்புகிறேன்”.

நம்பிக்கையுணர்வு நல்லெண்ணங்களையே வளர்க்கும்...!

02. நல்லதையே செய்து வாழும் நல்லவர்க்கு
நாணமதை சொத்தெனவே கொண்டவர்க்கு
கொல்லுகின்ற துன்பம் ஒன்று வந்து விட்டால்
குலைந்தழுது ஒழிவாரோ என்றும் மாட்டார்
அல்லவர்தான் அழுது நிற்பார் அரற்றி நிற்பார்
அறிவுடைய நல்லவர்கள் தெளிந்தே நிற்பர்
புல்லர்களோ மண்குடம் போல் உடைந்தால் போச்சு
பொன்குடமே நல்லவர்கள் உடைந்தும் பொன்னே.

03. அரசியல் ஆத்திச்சூடி..!!
------------------------------
அரிச்சந்திரன் மாதிரி ஆக்ட் குடு.,

ஆனவரை சுருட்டு.,

இலவசம் குடு.,

ஈயையும் கட்சியில் சேர்.,

உண்மையை மறை.,

ஊழலை உலகமயமாக்கு.,

எதிர்கட்சி மீது பழி போடு.,

ஏட்டிக்கு போட்டி அறிக்கை விடு.,

ஐந்து காலேஜாவது கட்டு.,

ஒபாமாவுக்கு விருந்து வை.,

ஓடி ஓடி துட்டு சேர்.,

ஓளவை சொல் கேக்காதே.,
ஃக்கு தப்பாய் மாட்டிக்காதே..!!

04.

மனைவி: இன்னைக்கு நைட் சாப்பிட என்ன வேணும்?

கணவன்: பருப்பும் சாதமும்.


மனைவி: நேத்துதானே அதைச் சாப்பிட்டோம்.


கணவன்: அப்படின்னா கத்திரிக்காய் வறுவல்.

மனைவி: உங்கப் பையனுக்குப் பிடிக்காது.


கணவன்: முட்டைப் பொரியல்?


மனைவி: இன்னைக்கு வெள்ளிக்கிழமை.


கணவன்: பூரி?


மனைவி: நைட் எவனும் பூரி சாப்பிட மாட்டான்.


கணவன்: நான் வேணா ஹோட்டல்ல இருந்து பார்சல் வாங்கிட்டு வரவா?


மனைவி: ஹோட்டல் சாப்பாடு சாப்பிட்டா உடம்புக் கெட்டுப்போகும்.


கணவன்: மோர் குழம்பு?


மனைவி: வீட்ல மோர் இல்ல.


கணவன்: இட்லி சாம்பார்?


மனைவி: நீங்க முன்னாடியே சொல்லி இருக்கணும்.


கணவன்: அப்ப நூடுல்ஸ் பண்ணு. கொஞ்ச நேரத்துல செஞ்சுடலாம்.


மனைவி: சாப்பிட்ட மாதிரியே இருக்காது. பசி எடுக்கும்.


கணவன்: வேற என்னதான் சமைக்கப் போறே?


மனைவி: நீங்க என்ன சொல்றீங்களோ அது.


கணவன்: ஆணியே புடுங்க வேணாம் போடி!


05. எனக்கு ஒரு பெரிய சந்தேகம்....

கல்யாணம் ஆன அப்புறம் எந்த ஒரு பொண்ணும் புருஷங்கிட்ட சொல்றாளுக

நான் யாரையுமே லவ் பண்ணதே இல்லனு....
அப்புறம் நம்மள்ள 90% பேர் தோல்வி அடையர
பொன்னுங்கள எவன் கட்டறான்...
இன்னுமா நம்புறானுங்க....
எவன் பொண்டாட்டியோ மாதவி
நம்ம பொண்டாட்டி சீதை...
இதானோ அது.....

ஒரே குயப்பமா இருக்கு....

நமக்கு வரப் போறவ எவன் கூட சுத்திட்டு இருக்களோ..
உங்க ஆளுதான்யா....

நன்றிகளுடன்.....
சிகரம்பாரதி.

Thursday, November 29, 2012

அடுத்த தலைமுறைக்கான அரசியல் விதிமுறைகள்!

வணக்கம் வாசக உள்ளங்களே! இன்று நாம் அடுத்த தலைமுறைக்கான அரசியல் எப்படி அமைய வேண்டும் என்பது பற்றிப் பார்க்கப் போகிறோம். இன்றைய அரசியலானது சாக்கடை அரசியல் என்றே அழைக்கப்படுகின்றது. இந்தநிலை மாறாதா என்கிற ஏக்கம் நம்மில் பலருக்கு உண்டு. ஆனால் நம்மால் என்ன முடியும் என்கிற இயலாமை எண்ணம் காரணமாக வெறும் வாய்ப்பேச்சோடு நிறுத்திக்கொள்கிறோம். வாக்குரிமை நம்கையில் இருக்கிற வரையில் நம்மால் அரசியலில் எதுவும் செய்ய முடியும். அதற்கு சமூகத்தின் ஒற்றுமையும் துணிச்சலும் தேவை. நமக்கான எதிர்கால அரசியல் எப்படி அமைய வேண்டும் என்பது பற்றி தெரிந்து கொண்டால் விரைந்து செயலில் இறங்க வசதியாயிருக்கும் அல்லவா? பதிவில் தேவையான இடங்களில் பொருத்தமான திருக்குறள்கள் பயன்படுத்தப்பட்டுள்ளன. வாருங்கள் பதிவிற்குள் போகலாம்.

1.கல்வி அறிவு 
நம் அரசியல் வாதிகளில் பலருக்கு கல்வியறிவு என்பதே கிடையாது. இதனால் அமைச்சுப் பதவிகள், அரசாங்க சொத்துக்கள் மற்றும் மக்கள் வரிப்பணம் என்பன துஷ்பிரயோகம் செய்யப்படுகின்றன. ஆகவே அரசியல்வாதியொருவர் தேர்தல் வேட்புமனு சமர்ப்பிக்கும்போது அவரது கல்வித்தகைமையை உறுதிப்படுத்துமாறு வலியுறுத்தப்படல் வேண்டும். அரசியல் வாதியொருவருக்குத் தேவையான குறைந்தபட்ச கல்வித்தகைமை அரசினால் நிர்ணயிக்கப்படல் வேண்டும்.

இதற்கும் குறளுக்கும் என்ன தொடர்பு?

மதிநுட்ப நூலோ டுடையார்க் கதிநுட்பம்
யாவுள முன்னிற் பவை.
நூலறிவுடன் இயற்கையான மதி நுட்பமும் உள்ளவர்களுக்கு முன்னால் எந்த சூழ்ச்சிதான் எதிர்த்து நிற்க முடியும்? முடியாது.
[பொருட்பால், அமைச்சு]

குறள் அப்படி மட்டுமில்ல, இப்படியும் சொல்கிறதே?

தூங்காமை கல்வி துணிவுடைமை அம்மூன்றும்
நீங்கா நிலனாள் பவற்கு.
காலம் தாழ்த்தாத விரைவான நடவடிக்கைகளும், அறிவுடைமையும், துணிவும் நாடாளுகின்றவர்களுக்குத் தேவையானவையும், நீங்காமல் நிலைத்திருக்க வேண்டியவையுமான பண்புகளாகும்.
[பொருட்பால், இறைமாட்சி]

இது மட்டுமில்ல, இன்னும் இருக்கு.....

அவையறிந் தாராய்ந்து சொல்லுக சொல்லின்
தொகையறிந்த தூய்மை யவர்.
ஒவ்வொரு சொல்லின் தன்மையும் உணர்ந்துள்ள நல்ல அறிஞர்கள், அவையில் கூடியிருப்போரின் தன்மையையும் உணர்ந்து அதற்கேற்ப ஆராய்ந்து பேசுவார்கள்.
[பொருட்பால், அவை அறிதல்]

இப்போ புரிஞ்சுதா?

இன்னும் இருக்கு.... ஆனால் நேர நெருக்கீடு காரணமாக மிகுதியை நாளை பார்க்கலாம். அதுவரை உங்கள் கருத்துக்களை பகிர்ந்து கொள்ளுங்களேன்....

அன்புடன் 
சிகரம்பாரதி.

Wednesday, November 28, 2012

கற்பிழந்தவள்

கனவில் கூட 
கண்டதில்லை இப்படியொரு 
காட்சியை 
எண்ணியும் பார்க்கவில்லை 
எனக்கிப்படி நேருமென்று 
அன்பு காட்டி 
அரவணைத்த கை 
காமம் கொண்டு 
கட்டியணைக்கும் என்று 
பிறந்தநாள் பரிசாக - எனக்குப் 
பிடித்த ஆடையைப் 
பரிசாக அளித்தவரே - அதைப் 
பறித்து துச்சாதன வேடம் கொள்வாரென்று 

Child Wise information booklet

பள்ளிக்கூடம் சென்று வந்தேன் 
பல கலைகள் கற்றுவந்தேன் 
அனைவரிலும் 
அன்பு பாராட்டினேன் 
நல்லவர்கள் எல்லாம் 
நம்மோடு தான் இருக்கிறார்கள் என 
நம்பிக்கை கொண்டிருந்தேன் 


பொய்முகம் கொண்டிங்கு 
போலி வாழ்க்கை வாழ்வதேனோ 
சொந்தம் என்று உறவாடும் நீங்களே 
சுகம்தேடி எம்மேனி தொடலாமா 
சிறுமியர் நாங்கள் 
சிறுபாவமும் அறியாதவர்கள் 
உலகத்தை 
உங்கள் மூலம் 
அறிந்துகொள்ள 
ஆவலாய் இருந்தோம் 
ஆனால் நாங்கள் சுயமாகவே 
அறிந்துகொண்டோம் உங்கள் 
அனைவரின் முகத்திரைகளும் 
அகற்றப்பட்டதன் மூலம் 


கன்னித்தன்மை 
கொண்டவளைத்தான் 
கல்யாணம் செய்யவேண்டும் 
என்று 
எதிர்பார்க்கும் நீங்கள் 
எங்கள் 
கன்னித்தன்மையை 
களவாட முனைந்தது உங்கள் 
கயமைத்தனம் அல்லவா 


பிறந்தது முதல் 
இறப்பது வரை 
ஏதோவொரு சொந்தம் 
எம்முடன் வந்தவண்ணமே 
இருக்கிறது 
எல்லா சொந்தங்களையும் 
எம்மால் சந்தேகிக்க முடியாது 


சாதிக்க வேண்டும் நாங்கள் 
சிதைத்து விடாதீர்கள் 
வாழ்க்கையை வாழவேண்டும் 
வடுவாக்கி விடாதீர்கள் 
நாளை 
எல்லோரும் என்னைச் 
சொல்லலாம் 
"கற்பிழந்தவள்" என்று 
ஆனால் அவர்கள் 
அறிந்திருக்கமாட்டார்கள் 
பத்து வயதிலேயே - நான் 
பட்ட வேதனைகளை!


இக்கவிதை பாலியல் ரீதியாக உறவுகளாலேயே துன்புறுத்தப்பட்ட ஒரு பெண் குழந்தையின் குரலாக இங்கு பதியப்பட்டுள்ளது. இதற்கான தகுந்த பிரதிபலிப்பை உங்களிடம் இருந்து எதிர்பார்க்கிறேன்.

அன்புடன்,
சிகரம்பாரதி.

Tuesday, November 27, 2012

இலங்கையின் முதலாவது செய்மதி விண்ணைத் தொட்டது!


வணக்கம் சொந்தங்களே! இன்று இலங்கையின் மிக முக்கியத்துவமானதும் வரலாற்றில் தடம் பதித்ததுமான முக்கிய நிகழ்வொன்று சீன மண்ணிலிருந்து இடம்பெற்றிருக்கிறது. சுப்ரீம் செட் வன் (Supreme Sat One) என்னும் இலங்கைக்கு சொந்தமான செய்மதி சீனாவிலிருந்து ஏவப்பட்டிருக்கிறது. கடந்த 22 ஆம் திகதி ஏவப் படவிருந்த மேற்படி செய்மதி காலநிலை சீர்கேடு மற்றும் தொழிநுட்பக் கோளாறுகள் காரணமாக இன்றைய தினம் ஏவப் பட்டுள்ளது.



Supreme Sat (pvt) Ltd என்னும் நிறுவனம் இலங்கை முதலீட்டு அபிவிருத்தி சபையுடனான ஒப்பந்தத்தின் பேரில் சீனாவின் China Greatwall Industry Corporation (CGWIC) உடன் இணைந்து சுப்ரீம் செட் வன் (Supreme Sat One) என்னும் செய்மதியை 2012.11.27 அன்று இலங்கை நேரப்படி பிற்பகல் 03.45 மணியளவில் சீனாவின் Xichang Satellite Launch Centre இல் இருந்து Long March 3B/E Launch செய்மதித்தாங்கி மூலம் ஏவப் பட்டுள்ளது. இத்திட்டத்தின் அடிப்படை திட்டமிடல் உரிமையை விண்வெளியியல் பொறியியலாளர் ரோஹித ராஜபக்ஷ என்பவர் கொண்டுள்ளார். இலங்கை - சீன நிறுவனங்கள் சேர்ந்து உருவாக்கிய இச் செய்மதி செயற்றிட்டத்தின் தலைமை நிறைவேற்று அதிகாரி விஜித் பீரிஸ் ஆவார்.

ஏவுதளம் 

உலகில் சொந்த செய்மதியைக் கொண்டுள்ள நாடுகள் பட்டியலில் 45 வது நாடாகவும் தெற்காசியாவில் இந்தியா மற்றும் பாகிஸ்தான் ஆகியவற்றுக்கு அடுத்ததாக 3 வது நாடாகவும் இலங்கை இணைந்துள்ளது. இந்த செயற்றிட்டத்தின் பெறுமதி இலங்கை ரூபாவில் சுமார் 320 மில்லியன்கள் ஆகும். இந்த செய்மதியைக் கட்டுப் படுத்துவதற்கான நிலையம் கண்டி பல்லேகலையில் அமைக்கப் படவுள்ளது. தற்போது தனது ஓடுபாதை இலக்கை நோக்கி பயணித்துக் கொண்டிருக்கும் செய்மதியைத் தாங்கிய விண்கலம் அதனை அடைந்ததும் தன்னியக்க செயற்பாட்டில் செய்மதி நிலைநிறுத்தப்படும். இதனூடான தொலைத்தொடர்பாடல் சேவைகள் 2013 ஜூலை மாதமளவில் ஆரம்பிக்க எதிர்பார்க்கப்பட்டுள்ளது. 

செய்மதி நிறுவப்படும் செயன்முறை 


15 வருட ஆயுள் கொண்ட இச்செயமதியின் மொத்த எடை 5100 கிலோவாகும். இதன் மூலம் இலங்கையின் தொலைத்தொடர்பாடல் துறை நவீனமயப்படுத்தப்பட்டதும் மேம்பட்டதுமான சேவைகளை இலங்கை மக்களுக்கு வழங்கமுடியும் என எதிர்பார்க்கப் படுகிறது. இலங்கையின் தொலைத்தொடர்பாடல் துறையை இது அடுத்த யுகத்திற்கு இட்டுச் சென்றுள்ளது என்பதில் சந்தேகமில்லை.

Picture shows during the signing of the agreement -
Wang Zhongmin (CGWIC), R.M. Manivannan
(SupremeSAT) and Eshana De Silva (BOI) with other officials.

தகவல்களும் படங்களும் : இணையம் 
Related Posts Plugin for WordPress, Blogger...

கருத்து கந்தசாமி முகப்பலகை

பிடிச்சிருந்தா பகிரலாமே?